सैनिक आवासीय महाविद्यालय तेघरीको अभिभावक दिवस सम्पन्न

धनगढी, १६ माघ – सैनिक आवासीय महाविद्यालय तेघरी, कैलालीको नवौँ अभिभावक दिवस भव्यताकासाथ सम्पन्न भएको छ । सुदूरपश्चिम पृतना हेड क्वाटरका पृतनापति तथा महाविद्यालय सञ्चालक समितिका अध्यक्ष उप रथी वालकृष्ण कार्कीको प्रमुख आतिथ्ययतामा सम्पन्न कार्यक्रममा बुधवार विभिन्न सांस्कृतिक कार्यक्रम, खेलकुद तथा पुरस्कार वितरण गरिएको थियो ।
स्वच्छ तथा शान्त वातावरणमा गुणस्तरीय शिक्षा प्रदान गर्ने प्रतिबद्धता जाहेर गर्दै कार्यक्रममा महाविद्यालयका सम्पर्क अधिकृत सेनानी नीरज भण्डारीले अतिथिहरूलाई स्वागत गर्नु भएको थियो । महाविद्यालयमा नियमित रूपमा प्रशिक्षण गराइने खेल तेक्वान्दो, राष्ट्रिय सेवा दलका विद्यार्थीहरूले आफ्नो कौशल प्रदर्शन गरेका थिए ।

शैक्षिक सत्र २०७५ मा विभिन्न विधामा तथा कक्षामा उत्कृष्ट स्थान हासिल गर्न सफल विद्यार्थी एवं शिक्षक कर्मचारीहरूलाई प्रमुख अतिथिले पुरस्कृत तथा प्रशंसीत समेत गर्नुभएको थियो ।

 कार्यक्रममा प्रमुख अतिथिको मन्तव्य राख्दै सुदूरपश्चिम पृतनाका पृतनापति उप रथी वालकृष्ण कार्कीले  महाविद्यालयको चौतर्फी विकास गर्दै अब्बल शैक्षिक केन्द्रका रूपमा विकसित गर्ने  कार्यमा महाविद्यालय अविराम लागिरहने विश्वास व्यक्त गर्नुभयो । साथै प्राप्त सफलता र उपलब्धिहरूको प्रशंसा समेत उहाँले गर्नुभएको थियो । महाविद्यालयका प्रिन्सिपल अशोकराज खातीले उपस्थित सम्पूर्ण अभिभावक तथा अतिथिहरूलाई धन्यवाद ज्ञापन व्यक्त गर्दै आगामी दिनमा महाविद्यालयको अझ बढी उन्नयन र प्रगति हुने कुरामा जोड दिनुभयो । कार्यक्रममा विद्यालयले प्रत्येक वर्ष प्रकाशन गर्दै आइरहेको वार्षिक मुख पत्र ‘गोदावरी’ को नवौँ अङ्कको विमोचन भएको थियो  ।

नवौँ अभिभावक दिवस समारोहमा नं २५ बाहिनीका बाहिनी पति,  नं ५ का बाहिनी पति, महासेनानीहरू, प्रमुख सेनानीहरू, विभिन्न कार्यालयका कार्यालय प्रमुख तथा प्रतिनिधि, शैक्षिक संस्थाका प्राचार्य तथा प्रिन्सिपल, खेलकुद, सङ्घसंस्थाका प्रमुख, विभिन्न क्षेत्रका लब्ध प्रतिष्ठित व्यक्तित्व, अधिकृत वर्ग तथा अभिभावकहरूको बाक्लो उपस्थिति रहेको विद्यालयका शिक्षक हर्क बोहराले जानकारी दिए । कार्यक्रमको सञ्चालन शिक्षक केपी कलौनी र शान्ति उप्रेतीले  गरेका थिए ।