कविता: नयाँ वर्ष

            भान सिंह धामी
पात्रो फेर्न हतार छैन मनमा नौलो नयाँ वर्षको
देऊ क्यै उपहार हे! सकलमा सम्पुर्णता हर्षकाे
यो सन्जोग कसो विधान बलियो सङ्घर्ष उत्कर्षकाे
लाखौंलाख छ कामना नमन हे! आस्था र निष्कर्षकाे।

होला सुन्दर यो अझै समयको मैलो हरायो भने
थाम्ने हो नि सतर्कता यदि कतै त्यो लर्खरायो भने
बाली काट्न सबैजना जतनले लागे कि खेतैतिर
आफ्नो भाग्य कता छ हो वरवधू हेर्छन् पुरेतैतिर।

राम्रो काम अनेक गर्न सबले हातै उचाली दिने
आओ आज गरौं अठोट सबले सन्ताप फालीदिने
झुल्केला नि विकासको लहर त्यो गावै सबै पालिका
लौ ल्याओस् सब याेजना कुशलता नौलो नयाँ तालिका।

आओस् शान्ति अथाहको अमनको भित्रै तथा बाहिरै
होउन् मानव सत्यको सु-पथमा सारा सबै माहिरै
साझा शान्ति र सिर्जना मधुरता फैलेर आओस् वरै
सारा जीव विनासको निरसता वैलेर जाओस् परै।

लौ लौ स्वागत है नयाँ समयमा यो जङ्ग सङ्घर्षमा
जित्ने हाे सजिलै डटेर दुनियाँ नौलो नयाँ वर्षमा
मेरो यो शुभकामना सबजना आनन्दमा बेर्न हो
बैशाखै अनि चैतमाझ दुनियाँ विश्वाशमा घेर्न हो।