शुक्लाफाँटा राष्ट्रिय निकुञ्जमा पर्यटकको संख्या बढ्यो

October 31, 10:51

महेन्द्रनगर । विश्वमै दुर्लभ बाह्रसिङ्गेको झुण्ड देख्न पाइने कञ्चनपुरको शुक्लाफाँटा राष्ट्रिय निकुञ्जमा दसैँ तिहार लगायतका चाडपर्वमा अवलोकन भ्रमणका लागि आउने पर्यटकको सङ्ख्या वृद्धि हुँदै गएको छ ।

हरेक वर्ष वर्षाका केही महिना बन्द रहने शुक्लाफाँटा राष्ट्रिय निकुञ्जमा कात्तिक महिना सुरु भएसँगै आन्तरिक पर्यटक आउने क्रम बढ्दै गएको शुक्लाफाँटा राष्ट्रिय निकुञ्जले जनाएको छ । निकुञ्जका निमित्त कार्यालय प्रमुख प्रमोद यादवले कात्तिक महिनाको १२ गते आइतबारसम्म मात्रै शुक्लाफाँटामा चार सय १४ पर्यटकले अवलोकन भ्रमण गरेको जानकारी दिए ।

“यो महिनाको हालसम्म ३५ जीप सफारीभित्र भएको देखिन्छ,” यादवले भने, “कात्तिक महिना सुरु भएसँगै पर्यटक आउने क्रम बढ्दै गएको छ ।” शुक्लाफाँटामा वन्यजन्तु हेर्न फागुनदेखि जेठसम्म उपयुक्त समय भए पनि यहाँ असोजदेखि नै पर्यटक आगमन सुरु हुन्छ । तीन सय पाँच वर्गकिलोमिटर क्षेत्रफलमा फैलिएको शुक्लाफाँटामा दुई हजार तीन सयभन्दा बढी बाह्रसिङ्गे, ३६ वटा पाटे बाघ, १७ भन्दा बढी गैँडा, चार सय ५० प्रजातिभन्दा बढीका चराचुरुङ्गीको वासस्थान हो । साथै मुलुककै ठूलो घाँसे मैदानमा देखिने बाह्रसिङ्गेको झुण्ड यहाँको प्रमुख आकर्षण हो ।

आइतबारसम्म यहाँ चार सय १० आन्तरिक र चार विदेशी पर्यटकले अवलोकन गरेको निकुञ्जको तथ्याङ्कले देखाएको छ । “गत असोजमा आन्तरिक तथा बाह्य गरी २८ मात्रै पर्यटक यहाँ घुम्न आएका थिए,” यादवले भने, “प्रायः असोजसम्म पानीले गर्दा फाँट पुग्न बाटोको असहजताले पर्यटक आउन कमै हुन्छ ।”

धनगढी, महेन्द्रनगरलगायत घर भई दसैँ–तिहार बनाउन घर बिदा आउने अधिकांश स्थानीय पनि बिदाको सदुपयोग गर्दै शुक्लाफाँटा, झिलमिला ताल, बेदकोट ताल लगायतका पर्यटकीय क्षेत्रमा घुम्न जाने गर्दछन् । दसैँ र तिहारको समयमा आन्तरिक पर्यटकीय गन्तव्यका साथै यहाँबाट गड्डाचौकी नाका हुँदै भारत उत्तराखण्डको नैनिताल घुम्न जाने सङ्ख्या पनि बढी नै हुन्छ ।

त्यसैगरी शुक्लाफाँटा राष्ट्रिय निकुञ्जसितै जोडिएको नेपालको एक मात्र राना थारु सामुदायिक होमस्टेमा पनि पर्यटक आवागमन सुरु भएको छ । होमस्टेका सचिव चेतराम रानाले चाडपर्वसँगै पर्यटक आउने याम सुरु भएको बताए । उनले पर्यटक आउने जाने चहलपहल सुरु भएसँगै होमस्टेको कारोबार पनि वृद्धि हुँदै जाने बताए । “शुक्लाफाँटा, एसियाकै लामो झोलुङ्गे पुलदेखि भाइररोडसम्म यहाँबाट नजिक पर्ने भएकाले होमस्टे पाहुनाका लागि राम्रो गन्तव्य हो,” रानाले भने, “दिनभरि पर्यटकीय क्षेत्र घुमेर बेलुकी होमस्टेमा थारु परिवारको स्वाद लिँदै रात बिताउन पर्यटक आउँछन् ।”

उनले राना थारु होमस्टेमा वार्षिक दुई हजारदेखि दुई हजार पाँच सयसम्म पाहुना आउने गरेको बताए । रासस

सम्बन्धित वर्गका समाचारहरू

जन्म दिनको अवसरमा उप मेयर रावलद्धारा अस्पतालका विरामीलाई फलफुल…
डोटी ।  जन्म दिनको अवसरमा रमाईलो गरेर फजुल खर्च गर्ने परिपाटीको एक पछि अर्कोगरी विस्तारै अन्त्य… विस्तृतमा
विकास बजेट खर्च न्यून
धनगढी । चालु आर्थिक वर्षको आधाभन्दा बढी समय गुज्रिँदासम्म प्रदेशको विकास बजेट (पुँजीगत बजेट) खर्च… विस्तृतमा
पक्की पुलमा एक पटक एउटा गाडी
बाजुरा । बाजुराको साँफे–मार्तडी राजमार्ग अन्तर्गत पर्ने गुइगाड खोलामा निर्माण भएको नयाँ पक्की पुलमा… विस्तृतमा
कञ्चनपुरको दक्षिणी क्षेत्र : सधै बाघको त्रास
कञ्चनपुर / गत वर्ष चैतमा कञ्चनपुरको पुर्नवास सँग सीमा जोडिएको भारतमा पर्ने दुधुवा नेशनल पार्कमा… विस्तृतमा