डोटीको भगवती मावि तलारा एसइईमा उत्कृष्ट पहिचान बनाउँदै, ४ विद्यार्थी ‘ए प्लस’ 

डोटी - डोटीका सामुदायिक विद्यालयमा उत्कृष्ट विद्यालयको पहिचान बनाएको भगवती माध्यमिक विद्यालयले यस वर्ष पनि एसइई परीक्षामा उत्कृष्ट नतिजा ल्याएको छ । आदर्श गाउँपालिका वडा नम्बर ५ तलारामा रहेको सो विद्यालयले अरू वर्षझैँ शैक्षिक सत्र २०७९ मा पनि उत्कृष्ट नतिजा ल्याएको हो ।

उक्त विद्यालयबाट ६१ जना विद्यार्थी परीक्षामा सम्मीलित भएका थिए । जसमध्ये ४ जना ३.६ देखि ४.० जिपिए अर्थात् ए प्लस ल्याएर उत्तीर्ण भएका छन् । त्यस्तै ८ जना ३.२ देखि ३.६ जिपिए, ११ जना २.८ देखि ३.२ जिपिए, १८ जना २.४ देखि २.८ जिपिए, १३ जना २.० देखि २.४ जिपिए र ७ जना १.६ देखि २.० जिपिए ल्याएर उत्तीर्ण भएका विद्यालयले जानकारी दिएको छ ।

गत वर्ष पनि सो विद्यालयले एसइई परीक्षामा उत्कृष्ट नतिजा ल्याएको थियो । भगवती माध्यमिक विद्यालय तलाराले एसएलसी परीक्षामा राम्रो नतिजा ल्याएबापत एक पटक राष्ट्रिय पुरस्कार पाइसकेको छ । यसका साथै एसएलसी परीक्षामा लगातार ३ वर्षसम्म शतप्रतिशत विद्यार्थी उत्तीर्ण गराई सिकाइ उपलब्धि उच्चतम कायम गरेबापत २ पटक विद्यालय पुरस्कृत भैसकेको छ ।

विद्यालयका प्रधानाध्यापक टेक बहादुर सिंहका अनुसार बि.स. २०६५ सालदेखि विद्यालयले शैक्षिक गुणस्तरमा फड्को मार्न सुरु गरेको थियो । त्यस बेला उनी प्रधानाध्यापक नियुक्त भएका थिए । विद्यार्थीहरूको नतिजाले आफू लगायत विद्यालय परिवारलाई खुसी लागेको प्रधानाध्यापक सिंहले बताए । आगामी वर्ष अझै राम्रो नतिजा दिने गरी आफ्नो नेतृत्वको टिम क्रियाशील हुने उनको भनाई छ ।