विपक्षी गठबन्धनको घेराबन्दीमा प्रधानमन्त्री ओली, अब धेरै सुरक्षित छैनन् उनी
धनगढी,
एमाले अध्यक्ष तथा प्रधानमन्त्री केपी शर्मा ओलीलाई विपक्षी गठबन्धनले घेराबन्दी बढाउँदै गएको छ । केन्द्रमा ओलीविरुद्धका कदममा सफलता पाउन नसके पनि प्रदेशमा विपक्षी गठबन्धन बलियो बन्दै गएको छ । सुदूरपश्चिमका मुख्यमन्त्री त्रिलोचन भट्टले मंगलबार विश्वासको मत लिए । जहाँ उनको सरकार जोगाउन एमालेकै माधव नेपाल खेमा निर्णायक भयो ।
केन्द्रमा विपक्षीलाई दाउपेच र तिकडम गरेर पछाडि पारिरहेका प्रधानमन्त्री ओलीले प्रदेशमा पनि आफ्नो विपक्षमा रहेका सरकार गिराउने प्रयास गरेका थिए । संसद र संविधानका धारा छलेर जसरी हुन्छ, सत्तामा टिकिरहने रणनीतिमा लागेका ओलीकै सिको लुम्बिनी र गण्डकी प्रदेशका मुख्यमन्त्रीहरुले गरेका छन् । जस्तो लुम्बिनीमा विश्वासको मत नलिएरै शंकर पोखरेलले पुनस्नियुक्ति लिए । गण्डकीमा पनि प्रदेश सभालाइ छलेरै मुख्यमन्त्री पृथ्वी सुब्बा गुरुङ कुर्सीमा आसीन छन् । यसले राजनीतिमा आचरण र नैतिकताको ठूलो प्रश्न उब्जाएको छ ।
अहिले प्रदेशहरुमा ओली पक्षलाई कमजोर बनाउन एमालेकै असन्तुष्ट समूहले विपक्षलाई साथ दिएको छ । त्यही कारण सुदूरपश्चिममा ओलीको प्रयास विफल भएको छ । लुम्बिनीमा नेपाल समूहसहित विपक्षीहरु सरकारविरुद्ध एक ठाउँमा छन् ।
गण्डकीमा पनि मुख्यमन्त्री गुरुङविरूद्ध विपक्षी गठबन्धनले चुनौती दिइरहेको छ।
प्रदेश २ मा मुख्यमन्त्री लालबाबु राउतले एमाले संस्थापननिकट देखिएको जसपाको महन्थ ठाकुर पक्षलाई हटाएर कांग्रेस र माओवादीसहितको गठबन्धन सरकार बताउँदै छन् ।
कर्णाली प्रदेशमा पनि विपक्षीको एकताकै कारण सरकार ढाल्ने ओली पक्षको प्रयास असफल भयो । ओली पक्षले नै नेतृत्व गरेको बागमती र प्रदेश १ को सरकार मात्र अहिलसम्म सुरक्षित छ । तर विपक्षी गठबन्धनले प्रदेशतिरबाट बढाएको घेराबन्दीले ओली पनि धेरै सुरक्षित छैनन् भन्ने सन्देश दिएको छ ।