धनगढीमा उपचाररत कोरोना संक्रमित युवककी भाउजू पनि अस्पताल भर्ना

धनगढी, चैत्र २२ - सेती प्रादेशिक अस्पतालमा उपचाररत धनगढीका ३४ वर्षीय कोरोना संक्रमित युवककी भाउजूलाई अस्पताल भर्ना गरिएको छ । 
कोरोनाका सम्भावित लक्षण देखिएपछि उनलाई अस्पताल भर्ना गरिएको हो । सेती प्रादेशिक अस्पतालका इमर्जेन्सी विभाग प्रमुख डा जगदीश जोशीले ज्वरोलगायतका अन्य लक्षण देखिए पछि अस्पताल भर्ना गरिएको जानकारी दिए । 
उनलाई साढे १० बजेतिर एम्बुलेन्स मार्फत घरैबाट अस्पताल पुर्‍याइएको हो । 
अहिले उनलाई सेती प्रादेशिक अस्पतालको आइसोलेसन वार्डमा भर्ना गरिएको छ । 
जोशीले संक्रमित युवकका परिवारको रिपोर्ट आज ४ बजे आउने बताए । उक्त रिपोर्ट धनगढी आउपुग्ने वा काठमाडौबाटै सार्बजनिक गरिने हो भन्ने बिषयमा भने जानकारी प्राप्त नभएको उनको भनाइ छ ।